आम चुनावको मिति नजिकिँदै जाँदा काठमाडौं क्षेत्र नं. १० को प्रदेशतर्फ चुनावी सरगर्मी ह्वातै बढेको छ । अहिले उम्मेदवारहरु आ–आफ्ना एजेण्डा लिएर मतादाताको घरदैलोमा पुगेका छन् । काठमाडौं क्षेत्र नं. १० मा राप्रपाबाट उमेशराज सापकोटा चुनावी मैदानमा छन् । उनी ‘हलो’ चुनाव चिन्ह लिएर प्रदेश तर्फ क बाट चुनावमा होमीएका छन् । सापकोटा उम्मेदवारी बनेसँगै अहिले क्षेत्र नं. १० का मतदाताहरु निकै उत्साहित भएका छन् । अन्य राजनीतिक पार्टी भन्दा राष्ट्रिय प्रजातन्त्र पार्टीमा मतदाताहरुको आर्कषण बढेको उम्मेदावार सापकोटा बताउँछन् ।
उनी भन्छन्, ‘अहिलेका मतदाता अलि सचेत भएको पाएको छु । उहाँहरु पार्टी भन्दापनि व्यक्ति राम्रो खोजिरहनुभएको छ ।’ आफु लामो समयदेखि यहि क्षेत्रमा राजनीति गरेको र यहाँका जनताको आशाको केन्द्र भएकाले पनि मतादाताहरु उत्साहित भएको उनको अनुभव छ । यसो त यस क्षेत्र देशकै राजधानी भएर पनि विकास निर्माणमा निकै पछि परेको छ । विगतमा यहाँ विभिन्न राजनीतिक दलले जिते तर यहाँका जनताले चाहेको जस्तो विकास गर्न सकेनन् । त्यसैले पनि यहाँको विकासलाई नयाँ आयम दिनका लागि आफुले उम्मेदवारी दिएको सापकोटा बताउँछन् ।
शिक्षा, स्वाथ्य, खानेपानी लगायत जनताको दैनिकी सहज बनाउने नै आफ्नो पहिलो प्राथमिकता रहेको सापकोटाको भनाइ छ । समाजसेवी सापकोटा विगतमा पनि जनताको अवस्था बुझ्न टोलटोल र घरघरमा पुग्ने गर्दथे र हाल पनि हरेक क्षेत्रमा सहयोग गर्दै आएका छन् । नयाँ अनुहार र पछिल्लो समय राप्रपाप्रति जनताको विश्वास बढेकाले पनि आफ्नो जित सुनिश्चित रहेको सापकोटा बताउँछन् । सापकोटा भन्छन्, ‘राप्रपाले उठाएका एजेण्डा जनताले मन पराउनुभएको छ । त्यस्तै कारण पनि मप्रति जनताले विश्वास देखाइरहनुभएको छ । आशा छ चुनावमा मलाई विश्वास गरेर मत दिनुहुनेछ ।’
यहाँ उत्पादन हुने लव्सी, नास्पाती नेपालभरि प्रख्यात रहेको भन्दै त्यसलाई प्रशोधन गरेर नेपालसहित विदेशमा समेत निर्यात गरिने सापकोटा बताउँछन् । यहाँको पर्यटन, कला, संस्कृति, भाषा, जात्राको संरक्षण र सम्वद्र्धनका लागि पनि आफ्नो जित आवश्यक रहेको सापकोटाको भनाइ छ । यहाँको शिक्षा, स्वास्थ्य, यातायात र रोजगारी सिर्जनका लागि आफु दत्तचित्त भएर लाग्ने सापकोटाले प्रतिवद्धता जनाउँदै आएका छन् ।
हाल घरदैलो अभियानमै व्यस्त रहेका सापकोटाप्रति जनताहरु सकारात्मक देखिन्छन् । चुनावी अभियानकै क्रममा अन्य पार्टीका कार्यकर्ताहरु आफ्नो पार्टीमा प्रवेश गरेको सापकोटा बताउँछन् ।